Sólborg RE 270 bjargar 2 mönnum af brennandi bát.

Hér er mynd af Sólborginni sem ég tók í gærmorgun þar sem hún lá í Reykjavíkurhöfn. Það hlýtur að vera óhugnanleg tilfinning að vera á litlum bát úti á sjó þegar eldur kemur upp. Sem betur fer fór allt vel í þetta skiptið.

Hetjur hafsins....

Tveimur mönnum bjargað

Að sigra heiminn.

Steinn Steinarr (Aðalsteinn Kristmundsson) hefði orðið 100 ára í dag ef honum hefði enst aldur. Hann var fæddur við Ísafjarðardjúp en ólst upp í Dölunum. Ég lærði þessa vísu eftir hann þegar ég var barn í eldhúsinu hjá ömmu og afa.

Að sigra heiminn er eins og að spila á spil
með spekingslegum svip og taka í nefið.

(Og allt með glöðu geði
er gjarna sett að veði.)

Og þótt þú tapir, það gerir ekkert til,
því það er nefnilega vitlaust gefið.

Kannski á þessi vísa vel við í dag á 100 ára afmæli skáldsins.

Hver sigrar heiminn að lokum.....

 

Fráleitur umhverfisráðherra.

Þessi arfavitlausa ákvörðun um heildstætt umhverfismat á Bakka hefur ekkert að gera með EES samninginn. Ef að við ætlum að komast út úr þessu skuldafangelsi sem við virðumst vera kominn í, þá á að byrja á að losa okkur við þennan ráðherra sem er vanhæfur í öllu sem lítur að virkjunum og stóriðju vegna síendurtekinna yfirlýsinga um álit hennar á slíkum málum. Síðan á að setja lög sem losa okkur við allt sem heitir umhverfismat, grenndarkynning og hvaða nöfnum þetta heitir allt saman.

Það sem kemur okkur á beinu brautina aftur eru aukin umsvif sem skila tekjum til landsins. Setja kraft í stórframkvæmdir. Auka veiðiheimildir og styrkja sjávarútveginn, því það er alltaf hann sem bjargar okkur þegar í óefni stefnir.

Minna bull-meiri pening.....

Allt í fína á Bakka

Allt Davíð að kenna.

Fyndið hvernig margir andstæðingar Sjálfstæðisflokksins sjá samasemmerki með hruni bankanna og Davíð Oddssyni. Ég hef alltaf vitað að Davíð er öflugur og hæfur til margra verka, en að hann hafi þetta allt í sínu valdi er nú í besta falli broslegt.

Sú þróun sem virðist vera að koma á daginn um allan heim er eitthvað sem engan gat órað fyrir. Allt tal um að finna sökudólga og ástæður verður að bíða þar til við komumst út úr mesta storminum. Þá þarf líka að leggja öll spilin á borðið. Það verður að fara yfir það hvernig það getur gerst að nokkrir útrásarmenn geti skuldsett heila þjóð svo svakalega að hún sé í skuldafangelsi í áratugi. En það sem skiptir máli nú er að lágmarka skaðann og standa saman í að koma sem best út úr þessari alheimskreppu.

Þegar þetta verður skoðað þá hlýtur allt að vera undir hvort sem er stjórnvöld, bankastjórnendur, fjármálaeftirlit og síðast en ekki síst útrásarvíkingarnir sjálfir. Þá er gott að hafa hugfast hver hefur verið þeirra helsti sendiherra, jú nefnilega forsetinn sjálfur Ólafur Ragnar Grímsson. Það var hann sem neitaði að samþykkja lög sem hefðu að hluta komið böndum á þessa menn. Hver man ekki eftir fjölmiðlalögunum. Að launum fékk hann að fljúga með þeim í fínu einkaþotunum.

Þetta verður skoðað ofan í kjölinn.....

Forsetinn hvetur til samstöðu

Eru engin takmörk fyrir heimsku fólks.

Þegar maður heyrir slíkar tröllasögur af erlendum lánum fólks þá verður maður að spyrja sig að því hvort fólk hugsi ekki neitt. Hvaða glæta er í því að taka 10 milljóna bílalán. Ég hef nú alla tíð verið mikill áhugamaður um bíla og önnur faratæki. En aldrei hefur hvarflað að mér að taka svona risalán, þó að oft hafi mig langað til að kaupa einhvern flottan bíl. Ég verð bara að segja að ég þakka fyrir það á hverjum morgni að skulda ekki meira.

Flottræfilsháttur......

Borgað fyrir að yfirtaka lán

Lækka stýrivextina strax.

Það er sterkur leikur í þeirri stöðu sem nú er uppi í þjóðfélaginu. Það sjá það allir sem sjá vilja að þetta stýrir ekki neinu. Lækkun niður í 6-8% skilar sér strax inn til heimila og fyrirtækja sem eru mörg hver illa stödd nú vegna skulda. Þetta yrði einnig til að létta á fólki og veita því meiri trú á framhaldið. Það hlýtur að vera komið að þessu nú, og engin ástæða til að bíða eftir næsta vaxtadegi í seðlabankanum.

Lægri stýrivexti......

Blaðamannafundur kl. 15 í Iðnó

Vel rekin sjoppa.

Ég er alveg sammála Davíð með þetta. Forsvarsmenn bankanna og eigendur þeirra hafa grætt gríðarlega á síðustu árum. Hvers vegna ættum við hin, og börnin okkar og barnabörn að borga þegar kemur að skuldardögum. Það hlýtur að fylgja einhver ábyrgð með öllum þessum bónusgreiðslum og kaupréttarsamningum.

Dálítið gáleysislega er vægt til orða tekið.......

Ríkið borgi ekki skuldir óreiðumanna

Flyt heim í víkina fögru í elinni.

Það er rétt hjá Elíasi að það er margt sem mælir með sameiningu. Í nánustu framtíð þarf að sameina Bolungarvík, Ísafjarðarbæ og Súðavíkurhrepp. Með bættum samgöngum um Óshlíðargöng og vonandi göngum til Álftafjarðar fljótlega þar á eftir, verður komin grundvöllur fyrir þessu. Þá væri hægt að samnýta hinar ýmsu deildir sveitafélaganna og ná fram hagræðingu í rekstri.

 

Vilji íbúanna er eitthvað sem þarf að fara að kanna fljótlega. Síðan er hægt að fara af stað með undirbúning eftir það. En við sameiningu þarf að sjálfsögðu að huga að grunnþjónustu á öllum stöðum s.s. Öldrunarþjónustu.  Það er ekki gott að hafa þetta eins og er til dæmis hér á Suðureyri þar sem engin öldrunardeild er, og fólk verður að flytja úr bænum sínum þegar það treystir sér ekki til að búa lengur heima.

Sameinaðir stöndum vér.....

Sameining kemur vel til greina

Væringar hjá Frjálslyndum.

Sigurjón er vafalaust mætur maður, ekki þekki ég það. Mér finnst hins vegar blasa við þegar farið er yfir sögu Frjálslynda flokksins að Addi Kitta Gau er kjölfestan í þessum flokk og hefur alltaf verið. Hann fór inn með Sverri Hermannsson sem uppbótarþingmann í fyrstu kosningunum sem flokkurinn fór í. Í þeim næstu var það áður nefndur Sigurjón sem naut góðs af því persónufylgi sem Addi á hér fyrir vestan. Og í síðustu kosningum komst  Kristinn H Gunnarsson inn á síðustu metrunum.

Ég er nokkuð viss um að ef og þegar hið nýja afl í flokknum nær að koma áætlunum sínum í framkvæmd þá er þessi flokkur búinn að vera. Grunnur flokksins er hér fyrir vestan og ég get ekki séð að stuðningsmenn flokksins hér séu hrifnir af þessum uppákomum undanfarið. Það voru slæm skipti að fórna Margréti Sverrisdóttur fyrir Jón Magnússon. það eru sennilega stærstu mistökin hjá formanninum og gætu fellt hann á endanum.

Ónýtt afl.....

Frjálslyndir í Reykjavík skora á Sigurjón

Bókun atvinnumálanefndar.

Hún var ansi hreint skondin bókunin sem fram kom í atvinnumálanefnd Ísafjarðarbæjar í vikunni. Þar tóku sig saman tveir fulltrúar minnihlutans og annar fulltrúi Framsóknarflokksins og bókuðu eftirfarandi.

Vísum til umfjöllunar í BB 16. september sl. þar sem höfð eru eftir Halldóri Halldórssyni, bæjarstjóra, ummæli um málefni samnings Ísafjarðarbæjar og Alsýnar ehf.   Mótmælum harðlega afskiptum Halldórs Halldórssonar af málinu áður en Atvinnumálanefnd hefur náð að ljúka umfjöllun um endurskoðun á samningnum.  Við teljum óeðlilegt að hann komi með slík inngrip á meðan málið er í vinnslu í nefndinni.

Eru þessir menn nokkuð búnir að gleyma að þessi nefnd er ráðgefandi nefnd á vegum bæjarins. Hennar hlutverk er að vinna fyrir stjórnendur bæjarins, ekki að ávíta þá fyrir að hafa skoðanir. Það vill þannig til að Halldór Halldórsson er æðsti embættismaður bæjarins  og hann hefur fullt leyfi til að tjá sínar skoðanir við fjölmiðla án þess að fá leyfi hjá atvinnumálanefnd.

Upphlaup.....