Hörður og skæruliðarnir.

Atburðir síðustu sólarhringa eru ekki til að auka álit mitt á Herði Torfasyni. Hann er jafn veruleikafyrtur og Steingrímur J. Hann talar um hversu illa ríkisstjórnin hefur staðið sig. Hann hvetur til mótmæla, og vill svo ekki kannast við óþekku börnin. Steingrímur aftur á móti er svo ófyrirleitinn í sínum málflutningi að það hálfa væri nóg. Hann vill skila peningunum frá IMF. Þrátt fyrir að allflestir séu sammála um að það hafi verið loka úrræðið í stöðunni. Hann hefur engar lausnir fram að færa í efnahagsumræðunni nema skattahækkanir. Hann og hans meðreiðarsveinar hafa verið á móti í öllum málum, þrátt fyrir að hafa engar lausnir til að leggja fram í staðinn.

Það þíðir ekkert fyrir Hörð að vilja ekki óþekku börnin. Það er hann sem hefur hamrað á því að fólk mæti og mótmæli. Að mínu áliti ber hann ábyrgð á því ástandi sem verið hefur í Reykjavík undanfarið og á að svara fyrir það. Það er algerlega ólýðandi að lögreglumenn séu grýttir og fluttir slasaðir á sjúkrahús, að reynt sé að kveikja í Alþingishúsinu og stjórnarráðinu.Steininn tók svo úr í dag þegar partur af byltingarhernum hótaði lögreglumönnum og fjölskyldum þeirra. Hvað halda þessir menn að þeir séu.  það er svo spurning út af fyrir sig, hvers vegna í fjandanum er ekki búið að handtaka Hörð Torfason fyrir landráð og múgæsingu.

Í þeim löndum sem þeir horfa helst til þ.e. Kúpu og Kína væru kommúnistarnir búnir að gera eitthvað róttækt í málinu, svo mikið er víst.

Skæruliðaforingi......

Á þriðja hundrað á Austurvelli

Kemur hreinsunarstarfið Framsókn að gagni.

Ég verð að viðurkenna það að ég var ánægður með að Framsóknarflokkurinn væri að byrja frá grunni að endurvekja trúverðugleika sinn. Hvernig hann hefur tekið á sínum málum undanfarið er að mínu mati það eina sem hægt var í stöðunni. Kannski spyr einhver hvers vegna ég sjálfstæðismaðurinn er svona ánægður með það. Það er því best að það komi fram strax að ég tel að Sjálfstæðisflokkurinn þurfi að fara í sömu hreingerningu fljótlega.

Mér sýnist á öllu að ef að Sjálfstæðisflokkurinn ætlar ekki að enda sem einn af smáflokkunum þá sé þetta óhjákvæmilegt. Það þarf að skipta um fólk í forystu okkar sjálfstæðismanna. Sjálfstæðisflokkurinn verður að viðurkenna sín mistök og byggja upp til framtíðar. Setja fram áætlun sem sýnir fólki fram á að hann eigi að vera forystuafl í uppbyggingunni sem fram undan er. Ég bind því vonir við að sjálfstæðisfólk hafi kjark til að tjá hug sinn á landsfundinum sem hefst í næstu viku, og gera þær breytingar sem nauðsynlegar eru.

Sigmundur Davíð stimplar sig hressilega inn í pólitíkina á Íslandi. Ekki ætla ég að úttala mig um þetta tilboð hans, eða hvort að það verður til góðs. Er á þeirri skoðun að kosningar fyrr, en í fyrsta lagi í haust væru slæm niðurstaða fyrir alla.

En það er ljóst að það verður að kjósa fyrr en 2011.....

Vill verja minnihlutastjórn falli

Athyglissýki á hæsta stigi.

Ólafur Helgi virðist vera haldin athyglissýki á hæsta stigi. Það má ekki hundur míga í umdæmi hans þá er hann kominn í fjölmiðla. En hvað varðar þessa yfirlýsingu frá honum í gær, þá segir hún meira um hann sem embættismann en nokkuð annað. Það að ætla að handtaka tæplega 400 manns sem ekki hefur getað staðið í skilum einhverra hluta vegna er fáránlegt. það er nógu slæmt að geta ekki staðið við skuldbindingar sínar, en að vera handtekinn á heimili sínu eða vinnustað er niðurlægjandi fyrir fólk.

Eflaust eru þó einhverjir sem alltaf verða vanskilamenn, og hafa fengið fullt af viðvörunum. En ég dreg í efa að það eigi við um alla þessa 370 aðila. En það ástand sem uppi er í þjóðfélaginu lagast ekki við það að svona valdníðslu embættismenn fái að beita sínum aðferðum. Það verður að segjast eins og er að dómsmálaráðherra gerði það eina rétta í stöðunni að setja ofan í við embættið. Sýslumaðurinn hefði örugglega ekki bakkað ótilneyddur.

Plús fyrir dómsmálaráðherra....

Endurskoðar fjárnámsaðgerðir

Á meðan kötturinn er ekki heima leika mýsnar sér.

Held að Samfylkingin ætti fyrst og fremst að einbeita sér að því að standa við þann sáttmála sem nú er í gildi. Það voru ekki margir dagar frá undirritun hans þar til að samfylkingarfólk var byrjað að hamra á því að honum yrði breytt. En það er bjargföst trú mín að Sjálfstæðisflokkurinn og þjóðin vilja ekki ganga í Evrópusambandið. 

Ingibjörg Sólrún er límið í Samfylkingunni. Á meðan hún er ekki til að halda hjörðinni saman, þá er hún út og suður.

Hvar er varaformaðurinn ?......

Skúli Helgason: Krafa um breytingar á rétt á sér

Afleit niðurstaða ef af verður.

Það er hrein hneisa fyrir stjórnvöld ef að þetta verður niðurstaðan. Það eru ótal margir hlutir sem hægt er að skera niður áður en Landhelgisgæslan verður vængstýfð. Það að Týr og Ægir hafi meira og minna verið bundin við bryggju í haust er eitthvað sem má ekki gerast.

Það er óforsvaranlegt að sjómennirnir okkar þurfi að eiga það á hættu að stofnunin sem á að vera þeim til aðstoðar sé hálf lömuð vegna fjársveltis.

Þetta flokkast sem landhelgisbrot.....

                                                                                     Mynd af vef lhg.is

Óumflúið að Gæslan segi upp

Stór stund hjá formanni KFÍ.

Einkasonurinn 7 ára gamall er byrjaður að æfa körfubolta. Þrátt fyrir að karl faðir hans hafi verið í þessu vafstri í 10 ár þá hefur hann ekki sett neina pressu á drenginn um að hefja æfingar. Um jólin var svo jólakörfubolti og þar mætti Þorleifur Hallbjörn ásamt fullt af krökkum. Honum fannst svo gaman að hann ákvað sjálfur að byrja að æfa. Og ekki skal standa á pabba að keyra hann á æfingar til Ísafjarðar 3 í viku.

Nú dripplar hann körfubolta um allt hús, mömmu sinni til mikillar ánægju.

Áfram KFÍ.....

Eins og að spila fótbolta á annað markið.

Heyrði í manni í gær sem var á fundi í Valhöll í síðustu viku um Evrópumál. Hann sagði að andrúmsloftið hefði minnt sig á fótbolta þar sem spilað er á annað markið, slík hefði andstaðan við Evrópusambandið verið. Ég er ekki hissa. Það kæmi mér allavega mikið á óvart ef sjálfstæðismenn samþykkja að ganga til viðræðna um aðild. Það hefur þá mikið breyst í flokknum frá síðasta landsfundi.

Á meðan við ekki fáum óskorað vald til að ákvarða um okkar auðlindamál þá kemur þetta ekki til greina að mínu viti. Við meigum aldrei selja okkar ákvörðunarrétt og fullveldi til Brussel.

Einstefna.....

„Brygðist sögulegu hlutverki sínu“

Já sæll, eigum við að ræða þetta eitthvað.

Er ekki að verða komið gott af þessum mótmælenda uppákomum. Þetta er heldur betur farið að missa marks finnst  mér undanfarið. Ekki mjög vænlegt til árangurs. Held eð það sé ekki ofmælt að segja að þessi Gunnar er einn lélegasti fundarstjóri sem sögur fara af. Sá fundinn sem var sjónvarpað og þvílíkt slys fundarstjórnin sem var boðið upp á þar. Sýnist á öllum þessum dæmalausu uppákomum að það sé vænlegast fyrir fólk velja sér leiðtoga sem fólk tekur mark á. Get ekki séð að Hörður Torfason sé sá maður. Hvernig væri að mótmæla friðsamlega og málefnalega og sjá hvort að þá er hlustað. Það er réttur fólks. Ekki að láta eins og óður skríll á götum úti með bundið fyrir augun eða í jólasveinabúningi.

Upp í fjall með kreppusníkir.....

 

Lá við að fundurinn leystist upp

Fyrirheitna landið.

Fylgismenn aðildar að Evrópusambandinu hafa haft hátt í umræðunni undanfarnar vikur. Þar fara fremstir í flokki forystumenn Samfylkingarinnar. Það þarf engum að koma á óvart að það fólk vilji ganga í Evrópusambandið. Þar á bæ hefur þetta samband verið lofað í mörg ár. En þar í flokki eins og öðrum eru skiptar skoðanir, og sumir flokksmenn hafa sagt að forystan hafi ekki heimild til að fara í aðildarviðræður. Sú staða sem nú er uppi í Íslensku efnahagslífi gerir það hins vegar að verkum að aðildarviðræður nú væru glapræði. Það að þurfa að fara í svoleiðis viðræður á hnjánum kæmi bara til með að veikja okkar stöðu.

En þó svo að ég hafi reynt að hlusta eftir því hvers vegna fólk vill fara þarna inn þá hef ég ekki enn heyrt þau rök sem duga til að sannfæra mig. Ég hef aftur á móti tekið eftir að formaður og varaformaður Samfylkingarinnar hafa ekki getað sagt fólki að við fáum að hafa óskertan rétt yfir auðlindum okkar til lands og sjávar. Ágúst Ólafur segist hafa trú á að það verði hlustað á okkar kröfur. Er það nóg fyrir hann að hafa trú ?  Ég hef hins vegar séð haft eftir forsvarsmönnum Evrópusambandsins að Íslendingar muni ekki fá neina sér meðferð í sjávarútvegsmálum ef til aðildarviðræðna kemur. Bara það var nóg til að sannfæra mig að þarna inn höfum við ekkert að gera.

Staða okkar í framtíðinni er mun sterkari fyrir utan sambandið. Þá getum við haldið áfram að selja þessum löndum okkar framleiðslu, og haft af því tekjur. Innganga gerir það aftur á móti að verkum að frá Brussel verður ákveðið hvað og hvert verður selt, og á hvaða verðum. Það eru slök skipti að mínu viti.

Hvað finnst fólki um þá staðreynd að í tólf ár í röð hafa skoðunarmenn reikninga Evrópusambandsins neitað að skrifa uppá þá. Ástæðan er alltaf sú sama, langstærstur hluti útgjaldaliða Evrópusambandsins eru óútskýrðir eða um 90%. Ekki er vitað í hvað þessir fjármunir (sem renna í sjóði sambandsins úr vösum skattgreiðenda) hafa farið nema að örlitlu leyti.

Er þetta það sem við getum sætt okkur við í framtíðinni.  Ég bara neita að trúa að fólk sé tilbúið að gefa eftir þann rétt sem við höfum til að ákvarða sjálf hvernig við ráðstöfum landsins gæðum. Þó að vissulega sé slæm staða uppi í Íslensku efnahagslífi, þá er hún ekki svo slæm að við þurfum að skríða inn í Evrópusambandið.

Á landsfundi Sjálfstæðisflokksins í lok janúar verður tekist á um þessi mál. Það er á hreinu í hvaða liði ég verð á þeim fundi.

Ég segi nei.....

Gleðilegt nýtt ár.

Við hérna í Túngötunni sendum ættingjum og vinum okkar bestu nýjárskveðjur. Einnig fá fá lesendur þessarar síðu kveðjur frá okkur. Vonandi að nýja árið verði öllum ánægju og heillaríkt.

Bregðum blysum á loft bleik þau lýsa um grund.....