Frjálslyndi kvótagrátkórinn.

Ekki rættist nú mikið af þeim spádómum hjá sumum stuðningsmönnum Frjálslynda flokksins að Kristján Þór Júlíusson yrði sjávarútvegsráðherra í boði Samherja. Það er undarlegt að sjá að þeir sem sem hæst hafa í umræðunni um kvótakerfið eru þeir sem hafa orðið undir og eru þess vegna svo mikið á móti kerfinu. Margir þessara manna hafa selt sig út og hagnast um stóra peninga en vilja nú fá fríspil aftur og komast inn í kerfið á kostnað þeirra sem enn eru að gera út. Gjafakvóti er vinsælt orð hjá þeim sem eru mest á móti, en það gleymist í umræðunni að mörg þeirra fyrirtækja sem eru í útgerð og fiskvinnslu í dag hafa keypt allan sinn kvóta og borgað stóra peninga fyrir. Menn tala líka um að þegar Ýsa og Steinbítur var sett í kvóta þá hafi menn fengið svo og svo mikið gefins, ég veit ekki betur en að öllum hafi verið frjálst að veiða á meðan þetta var ekki kvótasett og ná sér þar með í viðmiðun. Þannig að allt tal þessara manna um gjafakvóta dæmir sig sjálft.

Það er nú einu sinni þannig að það er gott að hafa hátt og finna hlutum allt til foráttu, en gleyma á meðan hinum raunverulegu ástæðum fyrir sinni eigin stöðu. Það er auðveldara að kenna alltaf einhverju öðru um eigin ófarir en að horfast í augu við staðreyndir. Menn hafa tekið málefni Flateyrar og notað þau til að draga upp hina verstu mynd af kvótakerfinu. Kvótakerfið er ekki gallalaust og það held ég að allir geti verið sammála um. Einar Kristinn hefur sagt að meðal annars hafi verið sett inn í kerfið byggðakvóti og línuívilnun til að bæta fyrir þessa galla sem á því eru. Það er líka talað um að Sjálfstæðismenn vilji afnema þess séraðgerðir, en svo er ekki. Það sem menn hafa vitnað í úr sjávarútvegsstefnu flokksins segir ekkert um afnám þessara tveggja þátta, þar hefur sjávarútvegsráðherra tekið af allan vafa. 

Á Flateyri snýst málið um að fólk hefur fjárfest í kerfi sem það var að vinna í, ef fólk hefur ekki lengur trú á því kerfi þá hefur það fulla heimild til að selja ef því sýnist svo. Hvað er öðruvísi við þeirra fjárfestingu eða þeirra sem fjárfesta í bönkum, flugfélögum, knattspyrnufélögum, hátæknifyrirtækjum eða bara hverju sem er. Hinrik hefur unnið kraftaverk á Flateyri og fólk má ekki gleyma því að hann er búinn að kaupa sinn kvóta tvisvar og ekkert hægt að segja þó hann vilji hætta. Fyrir mitt leyti vona ég bara að hann hagnist eitthvað eftir 25 ára starf í útgerð og fiskvinnslu.

 Það sem mér finnst vanta í þetta kerfi er að ungt fólk sem hefur brennandi áhuga á að hefja útgerð og fiskvinnslu hafi einhverja leið til þess. Eins og þetta er í dag þá sé ég ekki að það sé hægt með góðu móti, nema hafa sterka fjárfesta á bak við sig. Það á að vísu við í öllum hinum dæmunum sem ég taldi upp hér að ofan einnig, þú verður að hafa fjármagn á bak við þig til að komast af stað. Mér finnst að það sé kominn tími til að þessi söngur Frjálslyndra hætti, hann er að verða frekar þreyttur eins og sást í síðustu kosningabaráttu þá nennir fólk ekki lengur að hlusta á þennan grátkór. Það er nú einu sinni þannig eins og ég sagði að ofan að þessir menn hafa nýtt sér þær hliðar kerfisins sem þeim hafa hugnast en finna restinni allt til foráttu.

Kvótakerfið er komið til að vera.....

Athugasemdir

[Ingólfur H Þorleifsson, 28.5.2007 kl. 16:41]

Sæll Bjarni.

Þú veist alveg hverja ég er að tala um þegar ég segi grátkór. Það eru að sjálfsögðu ekki áhafnir þeirra báta sem hafa fengið uppsagnabréf á undanförnum vikum. Það eru þeir útgerðarmenn sem selt hafa frá sér kvótann og heimta nú að það sé gefið upp á nýtt. Ég get alveg verið sammála þér með að braskið verður að fara úr kefinu. LÍÚ hafa stungið upp á 90% veiðiskildu. kannski að það lagi myndina eitthvað.

[Ingólfur H Þorleifsson, 28.5.2007 kl. 21:06]

Las nú þessa grein Bjarni. Ég get ekki séð að Sverrir Leósson sé að tala fyrir marga sjálfstæðismenn í norðausturkjördæmi. Það er alveg ljóst og hefur alltaf verið að formaður Sjálfstæðisflokksins hefur á hverjum tíma umboð flokksins til að ákveða þessa hluti. Svoleiðis hefur þetta verið eins lengi og elstu menn muna, og þó að ekki allir séu ánægðir með það þá breytir það ekki miklu Geir áhvað þetta svona og þingflokkurinn studdi það allur. Hef einga trú á að þó svo einhver færi í fílu að hann færi í Frjálslyndaflokkinn, þó að hann sé opinn fyrir allra flokka flóttamenn.